មហោស្រពបេតិកភណ្ឌភាពយន្តអន្តរជាតិ ក្រោមចំណងជើងថា “ការចងចាំ!” លើកដំបូងបង្អស់នឹងប្រព្រឹត្តទៅនៅរាជធានីភ្នំពេញ ចាប់ពីថ្ងៃទី១ ដល់ទី៩ ខែមិថុនា ឆ្នាំ២០១៣។ ក្នុងព្រលឹង និងរូបភាពនៃការថែរក្សាបេតិកភណ្ឌ និងកេរ្តិ៍មរតកភាពយន្ត ដូចគ្នាទៅនឹងព្រឹត្តិការណ៍មហោស្រពភាពយន្តអន្តរជាតិធំៗតួយ៉ាងដូចជា Cannes Classics, Il Cinema Ritrovato នៅទីក្រុងបុលកុណា, Festival Lumière នៅទីក្រុងលីយ៉ុង, មហោស្រពការចងចាំទាំងអស់នៃពិភពលោកនៅ La Cinémathèque française។ ឥឡូវនេះមហោស្រពបេតិកភណ្ឌភាពយន្តអន្តរជាតិ ថ្មីមួយ នឹងធ្វើឡើងនៅរាជធានីភ្នំពេញដែលជាបេះដូងនៃព្រះរាជាណាចក្រកម្ពុជា។
មហោស្រព បេតិកភណ្ឌភាពយន្តអន្តរជាតិ ការចងចាំ! នឹងក្លាយជាប្រភេទមហោស្រពបេតិកភណ្ឌភាពយន្តដំបូងគេបង្អស់នៅអាស៊ី។
ការចងចាំ! នឹងត្រូវរៀបចំឡើងក្រោមទិដ្ឋភាពពីរគឺ៖
- កម្មវិធីភាពយន្តខ្នាតធំៗរបស់ពិភពលោក ជាមួយការចាក់បញ្ចាំងឥតគិតថ្លៃ ហើយសាធារណជនអាចចូលរួមទស្សនាដោយសេរី ជុំវិញប្រធានបទជ្រើសរើសឡើងជារៀងរាល់ឆ្នាំ ដែលសម្រាប់ឆ្នាំ២០១៣នេះ គឺស្ដីអំពី “របាំ/ការរាំ”។ (ភាពយន្តបេតិកភណ្ឌ ភាគច្រើនជាភាពយន្តដែលត្រូវផលិតឡើង និងមានភាពល្បីល្បាញនៅទស្សវត្សឆ្នាំ១៩៨០)
- បទបង្ហាញ វេទិការ សន្និសីទ សិក្ខាសាលា ដោយប្រមូលផ្តុំអ្នកជំនាញក្នុងវិស័យភាពយន្ត ជាពិសេសបណ្ណសារភាពយន្តអន្តរជាតិ (នៅអាស៊ី អ៊ឺរ៉ុប និងអាមេរិក) ដែលនឹងធ្វើឱ្យទីក្រុងភ្នំពេញក្លាយជាទីជំនួបអន្តរជាតិមួយសម្រាប់បេតិកភណ្ឌ និងអភិរក្សកេរ្តិ៍មរតកភាពយន្ត។